Prenzipiamos semana.

Ista semana ba a estar fartanera y rufertera. (Ixo aguardo...)

¿Por que digo isto? Ta que lo sepaz, soi un amante d´a cozina. D´a nuestra cozina y os nuestros guisos y tamien d´a intenazional, mas que mas a oriental. (Encara que mi mai me diz, a ormino, que foi “guisopos” u “comistrajes”, pos no le cuaca guaire a cozina forana.)
Ye asinas como me'n surte a nezesidat de mezclar as cozinas d´aquí y d´asti, a lo menos en o mio tozuelo.

Por ficar bels exemplos. ¿Ebaz parau cuenta que en o Sobrarbe ya feban sushi dende cutio?
Encara que no bi´n eba, de mar, ya feban o suyo maki-sushi con o que teneban a man, ye dezir, con a carne d´os animals que bi-eban, roz y o emboltorio comun ta atros cuchiflitos, as tripas. No, no son as morzillas… Me´n refiero a las Chiretas.

Embolber roz y rebutir-lo con bella coseta. O gran imbento que ba fer-se famoso con o sushi.

Chiretas, maki-sushi… o tamien as “Yaprak dolmasi” en turco, “Dolmen barg” en iraní, “Worac Inab” en libanes u “Sarma” t´os armenios.(Tot isto son fuellas de parra escaldadas con as que embolicar o roz y una mica carne, fendo un rulo. Tipico de Turquia y atros puestos arabes, como podez beyer.)

Arredol d´o mundo trobamos asinas platos de roz embolicao en alga nori, fuellas de parra u tripa de cordero, que clama-mos lamins u cuchiflitos, como o maki-sushi y as dolmas, muito parellanos a atros que son mas amanaus, como as chiretas. Platos que a chen en-troba en cualsiquier puesto de cualsiquier lugar. Pero ixo si, tien que estar foranos, porque trobar Chiretas en Zaragoza ye mas difizil que i beyer nebusquiar.


Y ye ubierta a rufierta con ista contimparazion.

Maitin mas y millor.



(Ye sapiu que os diaplerons yeran en as falsas, sera por ixo que en-saben muito, de guisar, pero agora malmeten os gadgets… cosas de que os lugars sean mas y mas batuecos. Bella cosa teneban que fer y en bel puesto teneban que estar.)